Դատական դեպարտամենտի ներկայացուցիչները հանդիպել են Կանադայի Նյու Բրանսվիկ նահանգի Գերագույն դատարանի նախագահ Մարկ Ռիչարդի գլխավորած պատվիրակությանը։

Դատական դեպարտամենտի ղեկավարի տեղակալ Արշակ Վարդապետյանը ներկայացրել է դեպարտամենտի կառուցվածքը, լիազորություններն ու այլ կառույցների հետ համագործակցության եղանակները։ Նա նշել է, որ դեպարտամենտի առաջնահերթություններից է ոչ միայն ապահովել դատական համակարգի անխափան գործունեությունը, այլև նպաստել նրա ինստիտուցիոնալ ամրապնդմանը և հանրային վստահության բարձրացմանը։

 Դեպարտամենտի ղեկավարի տեղակալը կարևորել է միջազգային գործընկերների, այդ թվում՝ Կանադայի փորձը դատարանների կառավարման, արդարադատության արդյունավետության բարձրացման և թափանցիկության ապահովման գործում։

 Դատական դեպարտամենտի ղեկավարի տեղակալ Արուս Հայրապետյանն անդրադարձել է դատական պրակտիկայի վերլուծության մեխանիզմներին, ինչպես նաև, հյուրերի խնդրանքով, մանրամասնել է անչափահասների դատական գործերը վարող դատավորների վերապատրաստման կարգին առնչվող հարցեր։

Կանադական կողմը ներկայացրել է դատական ծառայողների իրենց երկրի փորձը՝ նշելով, որ նահանգային առանձնահատկություններով է պայմանավորվում դատական ծառայողի գործառույթներն ու կարողությունների զարգացման անհրաժեշտությունը։

Նրանք հավելել են նաև, որ ոչ բոլոր նահանգներում է դատավարական գործընթացի կազմակերպումն իրականանցվում էլեկտրոնային եղանակով։
Այս համատեքստում դեպարտամենտի համակարգչային ծառայության պետ Խորեն Պետրոսյանը ներկայացրել է դատական համակարգի թվայնացման փորձն ու էլեկտրոնային արդարադատության գործիքների գործնական կիրառությունը։

Հանդիպման ավարտին կողմերը շնորհակալություն են հայտնել արդյունավետ հանդիպման և անչափահասների արդարադատությանը, դատական համակարգի գործունեությանն առնչվող փորձի փոխանակման համար։